Со цел да се интензивира фрескоживописувањето на соборната тетовска црква Свети Кирил и Методиј во работата вклучен е уште еден зограф, па вкупно двајца зографи сега треба да ги доцраат ѕидовите од храмот каде досега немало фрески. Фрескоживописување на соборниот храм Свети Кирил и Методиј е започнато од страна на зографот Зоран Бошковски, кој во моментот ги слика северниот и јужниот ѕид на храмот, додека западниот ѕид на храмот и горните делови кон галеријата ги слика зографот Венко Цветков.
-Со благослов на митрополит г. Јосиф се изведуваат сите овие работи. Сите досегашни фрески се даренија од благочестиви православни христијански верници од Тетово и околината кои даруваа фрески според нивните заштитници на семејствата или семејната слава итн. Места се уште постојат за фрески кои не се насликани, изјави отец Александар Стојановски, старешина на храмот.
Со целосното завршување на фрескоживописот, храмот ќе го добие потребниот сјај и убавина, сметаат во црквата.
-Благодарноста изразуваме до двајцата зографи, благодарноста до сите благочестиви правосалвни христијани кои вложија средства во фрескоживописувањето на соборниот храм, бидејќи за нас соборниот храм е многу значен храм како митрополитски храм, вели отецот Стојановски.
Во горните делови се насликани сцени од Господовите и од Богородичните празници, а иконите се во подолните делови, портрети на светители, кои што луѓето ги почитуваат.
– Односно се сликаат евангелски настани како што е Воскресение Христово, Слегување во Адот, Спасовден. Тоа во горните делови од ѕидовите, а во подолните делови се сликани пред се светители. Се сликаат и познатите светители, но и светители кои се канонизирани во поново време. Кај зографот Венко Цветков постои идеја кај горниот дел над галеријата да се сликаат сите светители кои се подвизувале на подрачјето на Македонија, маченици, светители, пустиножители. Македонска Православна Црква канонизираа и светители кои се од поново време. Се води сметка и тие да бидат застапени и воопшто светителите од поново време во православниот свет, истакна старешината на храмот.
Фрескоживописувањето на слободните ѕидови од црквата е започнато во периодот 2009-2010 година.
А.С
