Ќе се обновува изгорената куќа на Илија Серафимовски во тетовската населба Колтук, каде денес започна акција за расчистување на остатоците од изгорениот објект. Расчистувањето го започнаа соседите од населбата Колтук, членови на црковниот одбор при храмот Свети Никола, пратеникот Александар Велјановски, како и советниците Ангел Карапетров и Станислав Бојчески.
-Ќе се обноват две соби. Општина даде 150 илјади денари, а остатокот ќе се собира со донации на хуманите граѓани. Благодарност за сите што помагаат и апел до сите кои можат да помогнат на било кој начин за да овозможиме нормални услови за живот на нашиот сограѓанин, порачаа иницијаторите кои денес го расчистуваа просторот.
По пожарот во јануари, 49 годишникот Илија Серафимовски се сместени во дел од помошните простории на црквата Свети Никола. Бидејќи тој е самец, а во исто време и невработен, корисник на социјална помош, самиот не можел да најде нов стан под наем или да оди кај роднини.
-Комшииве ми помагаат цело време. Прво ја уредија собава, ми носат јадење, ми носат хигиена, тоа све што ми треба. Ако може од цела Македонија, ако може нека донираат ќе им бидам благодарен, изјави Илија.
Во пожарот тој доби повеќе изгореници по целото тело. Вечерта кога се случи пожарот Илија беше во опасност да го изгуби животот. За да се излезе од куќата му помогна и со тоа му го спаси животот неговиот 25 годишен сосед Мартин Малетиќ.
ас
