Советот на општина Тетово на денешната седница не дозволи јавното претријатие „Градски паркинг“ да земе кредит за да се покријат загубите од јануари до јуни оваа година. Тие бараа кредит во висина од 6.000.000 денари, а советниците од опозициските партии потенцираа дека ова претпријатие поради загубите и во поранешните години нема да можат да ги враќа позајмените пари.
Во првиот квартал од оваа година претпријатието прикажало загуба од 273.000 денари а додека во вториот квартал, во периодот на кризата со ковид-19, загубата е дури 3.137.000 денари, стои во финансискиот извештај кој го разгледуваа советниците.
-Тоа претријатие цело време работи со загуба и сега од нас бараат да им одобриме да земат кредит. Такво нешто воопшто нема смисла да одобриме и затоа бевме против оваа одлука. Ние цело време прашуваме како се направени тие загуби. Од граѓаните слушавме разни индиции за ова но сега видовме дека тие се совпаѓаат со состојбата во претпријатеито. Тие во првите три месеци, период кога уште не беше присутна пандемијата, имале загуба од околу 270.000 денари а веќе во наредното тромесечие загубата е околу 3 милиони денари. Ни велат дека во периодот на пандемијата не работеле но, секој кој се паркирал на паркинг местата плаќал“ вели Ариф Сељами, Советник од советничката група на Алијанса за Алнаците која е опозиција во Советот.
Директорот на ЈП „Градски паркинг“, не ни беше присутен на седница, што уште повеќе предизвика револт кај советниците од опозицијата кои посочија дека во минатото Општината покрила еден долг на претпријатието од 88.000 евра. И дел од советниците од мнозинските партии како и сите од опозиција гласаа против одлуката за земање кредит, што значеше дека по подолго време една одлука не е изгласана.
-После една долга дискусија не помина точката за давање согласност од страна на Советот на Општина Тетово за земање кредит на ЈП „Градски паркинг“ за решавањето на своите финансиски проблеми. Точката не помина и поради тоа што немаше доволно информации за задолжувањето бидејќи на седницата не беше присутен и директорот на претпријатието. Ние сакаме да му дадеме уште една можност на претпријатието па можно е оваа точка повторно да се најде на една од наредните седници. Како Општина во изминатиов период баравме и Владата да ни помогне во врска со овие приоблеми за кои бараме институционално да ни се помогне но, до сега немаме добиено никаков одговор“ изјави Беким Мемети, Претседавач на Советот на Општина Тетово.
На седницата беше одложена точката за советнички прашања, затоа што не беа присутни градоначалничката Теута Арифи и раководителите на секторите.
А.С
