По известувањето на СВР Тетово минатата недела до граѓаните кои оставиле хаварисани возила на јавни сообраќајни површини, се бележат седум случаи во Тетово и пет во Гостивар во кои сопствениците самите ги подигнале од местата на кои биле оставени. Од полицијата информираат дека другите возила во текот на неделава ќе бидат подигнати и транспортирани од општинските „пајак-служби“ на наменски определени локации.
– Според претходно извршената контрола од полициски службеници на СВР Тетово вкупниот број на хаварисани возила во Тетово се 17 возила и уште на најмалку толку ќе се постават писмени известувања. Во Гостивар бројката изнесува околу триесетина, од кои 14 биле обележани, а преостанатите ќе се обележат овие два дена, истакна Марјан Јосифоски, портпарол на СВР Тетово.
Целта е сите хаварисани возила да се отстранат од сообраќајните површини и да се обезбеди непречено и безбедно движење на пешаците и другите учесници во сообраќајот, потенцираат од тетовската полиција.
