Започна реконструкција на секундарна водоводна мрежа во тетовско Теарце, каде денес на увид на работите беше министерот за транспорт и врски Горан Сугарески заедно со градоначалникот Исен Асани. Со обновата на водоводната мрежа надлежните се надеваат дека значително ќе се намали губењето на водата за пиење.
-Направивме увид во градежните активности на водоводна мрежа која е со должина од 12 километри има добра динамика на работа и согласно роковите очекуваме овој проект целосно да биде завршен, рече министерот Сугарески.
-Со ова ќе се надмине најголемиот проблем во секундарната мрежа каде досега се губеше водата, а очекуваме да се намали и злоупотребата на водата. Таков е примерот од порано со Доброште кога се воспостави секундарна мрежа и се намалија губитоците, рече Исен Асани.
Ако се намали губењето на водата во системот нема да има потреба како летоска дополнителни количини да се земаат од реката Бистрица, велат од општината.
-Ние имаме 4000 жители по број но само 2000 се тука, а се трошат над 40 литри вода во секунда. Во иднина со 14 литри во секунда ќе бидат доволни и се ќе биде во ред. Нема да има ситуација како летово кога немаше вода и имаше суша па зедовме вода од Бистрица, по што се појави и неисправност на водата. За изворската вода ние имаме филтри и сега според параметрите е исправна за пиење, изјави Мефаил Мифтари од јавното претпријатие „Хигиена“ при општина Теарце.
За 12 километри секундарна водоводна мрежа ќе се потрошат 270 илјади евра.
