Станислав Бојчески советник од редовите на ВМРО ДПМНЕ во Советот на Општина Тетово побара одговорност од институциите особено од полицијата поради викенд акцијата во неколку кафулиња во градот. Тој потенцира дека младите беа третирани како криминалци при што полицајците од специјалните единици покажале и непотребна сила.
-Како млад човек од Тетово сум згрозен од однесувањето на Македонската полиција овој викенд во тетовските кафулиња. Како што сте запознаени овој викенд имаше акциска контрола по тетовските кафулиња, но за оваа регуларна акциска контрола не се користени секакви полицајци туку припадници на Единцита за брзо распоредување со полна борбена опрема.
Како претставник на младите во Тетово би ги замолил пратениците од власта од Тетово да ги постават следниве прашања на наредната собраниска седница за пратенички прашања:
– Би сакал да го запрашам Министерот за внатрешни работи и началникот на СВР Тетово дали младите во Тетово се најголемите криминалци за да вршите контрола со единица која се користи во случаеви од висок ризик?
– На кого му оди во корист заплашувањето и покажувањето на сила од МВР?
– Како претставници на партија која се залагаше за реформи во полицијата во 2016, и се залага за интеграција на Македонија во ЕУ дали ваквото однесување на МВР влева доверба кај граѓаните кон полицијата и дали во европските градови, кон кои се стремиме да се доближиме, полиција за проверка на лична карта и вакцинален сертификат користи специјални одреди на полицијата?
Тоа што го видовме викендов беше срам за Македонската Полиција и покажување на беспотребна сила кон народот во Тетово. Во овие тешки времиња народот во Тетово живее во страв и неизвесност поради зголемените цени и инфлацијата, и наместо вие како лидери да го смирите народот вие одбравте пат кон води кон зголемен страв и неизвесност.
Тетовчани добро ќе ги запаметат сликите од саботата каде младите во Тетово беа третирани како обични криминалци. Тетовската младина како и секој друга граѓанин ужива пресумпција на невиност, и заслужува службите кои ги плаќа преку своите даноци да се однесуваат без закани и агресија, вели Станислав Бојчески во своето обраќање до јавноста преку социјалните мрежи.
