ВМРО Народна партија ќе бара примена на Мајскиот договор на локално ниво, односно формирање на мнозинството да биде на принципот „победник со победник“. Ова на денешната прес-конференција го истакна носителот на листата со кандидати за советници Стевица Саркоски.
-Во оваа прилика сакам јавно да ја поставам дилемата кој дозволи во минатата локална власт да не партиципира партијата на Македонците која освоила мнозинство гласови. Дали Мајскиот договор важи за СДСМ и за ДПМНЕ? И на оваа прес конференција, но и во сите наредни мои излагања ќе инсистирам да биде постигнат договор помеѓу партиите од македонскиот блок ниту една партија да не партиципира во локалната власт сè додека не се издејствува Македонец да биде Претседател на Советот. Македонците мора да имаат една политичка функција во Општина Тетово,рече Стевица Саркоски, носител на листата со кандидати за советници.
Тој потсети на алармантната состојба со управувањето со отпадот во Тетово и ја посочи идејата за поефикасно справување преку фабрика за третирање на сметот.
-Дивите депонии, несобраниот и расфрлан отпад, лошата миризба се постојано околу нас. Иако во минатото се најувуваа многу решенија, од локални проекти до регионална депонија, сликата остана иста. ВМРО-НП Тетово има решение за отпадот, а тоа е Фабрика за отпад која ќе го преработи целиот комунален отпад од Тетово и околината. Фабрика која има нула емисии на штетни супстанци при преработката на отпадот.Потенцијален странски стратешки партнер е подготвен со инвестиција да влезе во овој проект партнерски со Општина Тетово. И затоа по конституирањето на Советот на Општина Тетово, советничката група на ВМРО-НП на седница ќе ја постави и точката за започнување на постапка за Изградба на фабрика за отпад, рече Саркоски.
Носителот на листата согласноидејата на еден од противкандидатите предлага партиите од македонскиот блок да потпишат договор со кој идните советници би донирале по 3 месечни паушали во годината како помош на семејства од социјално-ранливите категории.
-Во оваа прилика сакам да упатам апел до медиумите да биде организирана дебата на која ќе учествуваат носителите на советничките листи и на која директно ќе ги соочиме нашите ставови, погледи, но и понудените решенија за проблемите со кои тетовчани секојдневно се соочуваат. Само во телевизиска дебата граѓаните јасно ќе можат да ја препознаат вистинската програма и вистинските кандидати за советници, рече Саркоски.
