За едно деноноќие од 7 часот во петокот до 7 часот утринава тетовските полициски службеници извршиле контроли кај дури 519 лица да се утврди дали се дома поради добиените решенијата задолжителна изолација од Државен здравствен и санитарен инспекторат како мерка во спречување на ширење на коронавирусот. Освен тие полицајците контролирале и 139 лица кои имаат потпишано изјави дека ќе с е самоизолираат дома.
Марјан Јосифоски, портпарол на СВР Тетово, вели дека големиот број контроли значително го оптоваруваат работењето на полициските службеници на СВР Тетово со оглед на огромното подрачје кое го покриваат во вкупно шест тетовски општини.
-За секојдневните контроли се потребни многу време и ресурси и навистина полицајците се многу ангажирани. Дополнителен товар за полициските службеници претставуваат непочитувањата со оглед дека треба да се поведе постапка доколку се утврди дека не ги почитуваат решенијата, вели портпаролот Јосифоски.
Во рамки на секојдневните контроли за тоа дали се носат заштитни маски, во тетовско се изречени 85 прекршочни платни налози.
Во координација со Државен пазарен инспекторат ноќеска е затворен угостителски објект на улицата Илинденска во Тетово.
-Сопственикот Р.Б (41) од Мала Речица ќе се соочи со пријава според член 206 од Кривичниот законик поради не придржување до прописите за работа во време на епидемија, истакна Јосифоски.
Контролирани биле вкупно 22 угостителските објекти во три тетовски општини.
А.С
