Иницијативата „Тетово сака парк“ која предложи и побара формирање на прв градски парк, денеска доби едногласна поддршка од сите тетовски планинарски клубови, кои преку заедничко отворено писмо го поздравија и поддржаа предлогот за формирање на вистински парк во градот. Поддршката е од клубовите „Аргентус Моунт“, „Љуботен“, „Игл“, „Тетекс“, „Јелак“ и „Пиктрип адвенчрс“.
-Како спортски здруженија чие примарно поле на интерес и делување е планинарството, будни сме околу најразлични теми кои нè тангираат. Во прв план тоа се екологијата, заштитата на животната средина и промовирањето на здрави животни навики. Во таква насока е и унапредувањето на животната средина во нашата непосредна околина, односно градовите во кои живееме. Со ова заедничко писмо јавно го поддржуваме предлогот бидејќи освен што сметаме дека е рационален и изводлив, се бори за јавниот интерес на начин на кој во Тетово одамна не е направено. Имајќи ја предвид состојбата во која се наоѓа градот, формирање на ваков зелен појас станува нужна потреба за сите нас – неговите жители. Постоење на вистински градски парк го унапредува урбаното живеење преку давање можност за квалитетно поминато време на отворено, во зелен простор, се вели во писмото,
Иницијативата „Тетово сака парк“ беше покрената на 21 февруари од страна на 60-тина подносители.
Преку предлогот до општината, согласно Законот за локална самоуправа, беше побарано формирање на првиот градски парк на површина која е 87% во државна сопствена и претставува последна површина од таков тип на кој може да се формира парк. Зад предлогот за парк до сега застанаа и близу 3.000 граѓани преку потпишување на онлајн петиција.
ас
