Новинарите на „360 степени“ Зоран Јовановски од Тетово и Славица Филиповска од Скопје која потекнува од Тетовско, се добитници на наградата „Јашар Еребара за истражувачко новинарство која им ја додели Здружението на новинарите на Македонија за 2019 година.
Награден е нивниот прилог со наслов „360 на терен со УЈП – итроштини и ургенции на секој чекор“.
„Сториите на новинарите Зоран Јовановски и Славица Филиповска и дадоа на јавноста редок увид во работењето на инспекторите на УЈП со сите грди страни и разобличија обид за влијание што произведе повеќе ефекти во институциите. Ваквите стории ја сензибилизираат и едуцираат јавноста за корупцијата, но и влијаат на промена на однесувањето и менталитетот во однос на корупцијата“ соопштија од ЗНМ.
Наградата „Крсте Петков Мисирков“ за животно дело и беше доделена на долгогодишната новинарка на МРТ и известувач од Собранието, Мира Костиќ, која годинава стави крај на својата богата новинарска кариера. Наградата за најдобро новинарско известување за теми од локално и регионално значење за 2019 година за новинари од внатрешноста на Македонија му е доделена на новинарот Ване Трајков од Струмица за неговите прилози за проблематичниот тендер на ЈПКД „Комуналец“ Струмица.
Поради ситуацијата со коронавирусот во државата и препораките на институциите за избегнување на групни собири, ЗНМ не организира настан за свечено доделување на наградите.
А.С
