Претседателот на ВМРО ДПМНЕ Христијан Мицкоски по седница на Централниот комитет, соопшти дека партијата добива двајца нови потпретседатели, од кои една е Гордана Димитриеска Кочоска, родена во Тетово. Гордана која е родена 1983 година, досега беше членка на Извршен комитет на ВМРО ДПМНЕ.
– Таа е магистер по економски науки при Универзитетот Свети Кирил и Методиј во Скопје. Работела во Стопанска банка, во Македонски Телеком сектор за даноци, во Министерство за финасии во сектор за јавен долг како и во Управен одбор на АД Електрани на Македонија, инфомираше Мицкоски на прес-конференција по седницата на комитетот.
Гордана Димитриеска Кочоска е мажена и мајка на две деца.
-Исправена сум пред нов предизвик, кој нималку не е лесен. Но, кога станува збор за Македонија и за нашата и иднината на нашите деца, нема колебање. Истрајност, многу работа, желба за убава иднина и посветеност, тоа е она на што се обврзав. Благодарна сум на довербата која ми е укажана од страна на претседателот Мицкоски. Да се биде потпретседател на најголемата политичка партија во Македонија е пред се чест, но и обврска која ќе биде оправдана. Мој приоритет ќе биде борбата за подобар живот на македонскиот народ. Она што во овие тешки времиња ни е потребно е стабилна економија и извесна иднина. За тоа лично и целосно ќе се заложам, со сето мое досегашно искуство и знаење, порача Гордана Димитриеска Кочоска преку социјалните мрежи.
Таа беше и заменик-министер за финансии од страна на ВМРО-ДПМНЕ во техничката Влада.
