По повод известувањето на Тетово инфо на 4 ноември за одржан состанок на жителите на Вратница, Старо Село и Орашје со претставници на институците и инвеститорот на мала хидроцентрала на Вратничка Река добивме став и од компанијата Трибека Хидро, инвеститор и засегната страна спомената во објавата. Од таму потенцираат дека за градбата на хидроцентралата ги имаат сите документи кои ги бара државата меѓу кои и еколошки елаборати за да се прикаже еколошка оправданост на инвестицијата.
-Со малата хидроцентрала нема негативно влијание врз водата од Вратничка река со оглед дека водата не исчезнува, туку само се користи да ги придвижи турбините и потоа да продолжи со текот согласно гравитацијата. Со еколошкиот елаборат е превдидено да не се загрозува минималниот биолошки проток на реката. За разлика од друг вид централи производството на струја со вода не загадува околината ниту пак користи друг вид материјал за работа. Водата не може да се изгуби ниту да се загади како резултат на процесот на производство на електрична енергија. Воедно хидроцентрала не генерира друг вид материја која ја загадува животната средина-се создава чист извор на енергија и не се создава отпад, наведуваат од Трибека Хидро.
Од компанијата потенцираат и дека овој концепт на создавање на електрична енергија дава придонес за подобра животна средина согласно стандарди на Европската унија.
– Малите хидроцентрали значат можност да се прозиведува струја, а не да се увезува електрична енергија. Струјата добиена од хидроцентралите претставуваат поеколошки добиена електрична енергија од онаа добиена од јаглен. Аерозагадувањето ќе се намали ако се создава струја од хидроелектрани, ветерници и соларни компоненти. Вака произведена струја придонесува за одржливиот развој и овозможува децентрализирано производство на електрична енергија. Воедно претставува можност да се вработуваат луѓето од локалната средина, односно селото Вратница, истакнуваат од Трибека Хидро.
Од компанијата посочуваат дека согласно законските процедури доколку се појави потреба за сечење на дрвја при изградбата на објектот за малата хидроцентрала, ќе ја почитуваат обврската да посадат двојно повеќе дрвја. Исто така информираат дека би требало да почнат со градежните работи согласно одобрението и добиените насоки од страна на Владата.
