Како дел од одбележувањето на 25 години од основањето на Универзитетот во Тетово делегација на раководство заедно со професорите, деканите и студентите ги посетија гробовите на првиот ректор Фадил Сулејмани и Абдилселам Емини, загинат 1995 година во одбрана на универзитетот.
-Тие двајца се историски личности без кои овој универзитет ќе останеше само сон на Албанците. Инаку, Абдилселам Емини беше убиен од страна на полициските сили во 1995 година, во одбрана на зградата на универзитетот, еден ден откако започнаа првите предавања на УТ. Фадил Сулејмани ги постави првите темели на овој храм на знаење од каде доаѓаат најпаметните генерации на иднината на Албанците на земјава, рече заменик-ректорот за образование на Универзитетот во Тетово Решат Ќаили.
Универзитетот во Тетово е основан на 4 јуни 1994 година. Во јануари 2004 година Универзитетот во Тетово стана официјален со усвојување на законот од страна на Собранието на Република Македонија за основање на Државниот универзитет во Тетово. Наставата во оваа институција е главно на албански, како и на македонски и англиски.
А.С
