Утре започнува скијачката сезона на ски – Центарот „Попова Шапка“, информираат денес од Друштвото за туризам ЕЛЕМ Турс, подружница Попова Шапка. Од 9 часот ќе почне работата на ски-лифтовите со што ќе се овозможи скијање по веќе подготвените патеки.
-Скијачкиот центар е целосно подготвен и екипиран за непречено и безбедно функционирање на ски-терените. Спроведени се редовните технички подготовки и активности за почеток и тек на новата ски-сезона, извршено е обележување на постојните патеки, а скијачките терени се подготвени со помош на машините за подготовка на скијачките патеки. За утрешното скијање во функција ќе бидат ставени жичарниците „Св. Илија“ и „Церипашина“ и ски – лифтовите „Аеродром“ и „Ге“, информираат од Попова Шапка.
Утре користењето на ски-лифтовите ќе биде бесплатно. Новина е можноста за туристички разглед со снеготапкач (ратрак). Новиот шестосед нема да биде во функција.
Ланскиот сезонскиот ски – билет ќе важи и оваа скијачка сезона, а останатите билети остануваат со иста цена. Сите кои имаат лански сезонски ски – билети треба да отидат во хотел „Попова Шапка“во Ски – центарот „Попова Шапка“, за истите да бидат активирани и ставени во функција.
А.С
