Центарот за еднакви можности “Бубамара“ од Тетово реагира на транспарентот кој на денешниот протест беше истакнат и залепен на зградата на Општина Тетово со говор на омраза кон жените. Воедно посочуваат дека го следат говорот на омраза кон жените во политиката и во предизборниот период.
-Сметаме дека уште пред официјалниот почеток на кампањата, се користел сексистички и говор на омраза против жените кандидати во овие локални избори.Употребата на ова реторика беше присутна и денес на протестот организиран во Тетово. „Бубамара” силно верува дека говорот на омраза и сексизмот кои имаат за цел да го погазат достоинството на жените во политиката треба да престанат. Ги повикуваме релевантните институции да преземат конкретни мерки за да не се „нормализира“ и релативизира оваа реторика како што е нормализирана до сега, се вели во нивното соопштение.
Понатаму потенцираат дека говорот на омраза против жените во политиката сериозно се заканува да ги заплаши и спречи девојките и жените кои се заинтересирани за политика.
– Затоа, ги повикуваме граѓаните, политичките партии и пошироката јавност во Северна Македонија да бидат внимателни со јазикот што го користат против жените, велат од организацијата.
„Бубамара“ бара од сите страни вклучени во овој процес, да ја одразат дисциплината и да спроведат изборна кампања каде што ќе преовладуваат демократијата и мирот и каде ќе се почитуваат вредностите на владеењето на правото.
На зградата на Општина Тетово денес беше залепена порака со недолична содржина кон жените, на албански и англиски јазик, а која гласи- „Луѓето горат, курвите си ги чешлаат косите“.
ас
