Од Центарот за јавно здравје во Тетово предупредуваат дека во периодот што следи во месеците октомври и ноември можно е да се повтори ситуацијата како во изминатите две години водата за пиење да има промена на мирисот и вкусот. Сепак ги советуваат граѓаните дека нема место за страв бидејќи изминатите години се утврдило дека нема пореметувања на параметрите за безбедна вода.
-Промената на мирисот и вкусот може да се повтори поради паѓање на вегетацијата односно лисјата во водата што се користи од реките Пена и Лешница во новиот водоснабдителен систем. Апелирам да не се крева премногу страв и да не се обрнува премногу внимание затоа што ние внимаваме на квалитетот и безбедноста на водата за пиење. Лани и предминатата година имаше многу јавувања за промена на мирисот и на вкусот и за среќа нашите испитувања покажаа дека сите останатите параметри се во рамките на дозволените граници и дека водата одговара на параметрите дека е безбедна за пиење, изјави специјалистот по здравствена екологија д-р Ратко Давидовски.
До оваа појава дојде во септември 2017 година кога започна да функционира новиот водоснабдителен систем со искористување на водата од реките на Шар Планина.
-Во овој период од годината поради намалување на штедроста на изворите на Шар Планина е вклучена и Пена и Лешничка река како и филтер станицата каде се кондиционираат овие параметри кои што треба да бидат во рамките на нормалните вредности, рече Давидовски.
Доколку водата со променетиот мирис и вкус не е прифатлива за луѓето за пиење Давидовски вели да не се користи.
-Се работи за субјективно чувство, водата ја контролираме и мината и предминатата година беше безбедна за пиење. Кому му е смета мирисот и вкусот нека не ја пие, а останатите можат да ја пијат се додека не ние не ја забраниме, потенцира докторот.
Од центарот напоменуваат дека секојдневно се следи квалитетот на водата и по потреба службите реагираат. Новиот водоснабдителен систем од 2017 година донесе дополнителни количини вода со како трајно решение за деценискиот проблем со недостиг на водата за пиење во градот.
