Означен е официјален почеток со работа на најновата шестоседна жичница на Попова Шапка. Жичницата се протега долж патека од 1391 метри, која се минува со затворени кабини во кои има шест места.
-Пуштањето во употреба на новата жичница ја означува силната поддршка за развој на зимскиот центар. Исто така претставува еден од начините и решеноста на оваа Влада и на АД ЕСМ се со цел да направиме развиток на овој зимски центар. Треба да се направи добар план и стратегија како треба да се развива и која е целта крајна со Попова Шапка. Во тој правец треба да се заложиме сите, на овој начин ја покажуваме нашата политичка волја, разработуваме детален план и на прогласување заштитена зона на Попова Шапка, направивме анализа за капацитетите, изготвување на ДУП се со цел да се придонесе да се заокружи процесот, истакна премиерот Спасовски.
Генералниот директор на Електрани на Северна Македонија, Васко Ковачевски истакна дека за изградба на оваа жичница се потрошени 9 милиони евра.
-Проектот започна во 2014, а од 2016 се работи на терен, но поради неколку пропусти имаше застој. Но во 2019 од ЕСМ и ново раководство со секојдневни активности успеваме до крајот на 2019 да го завршиме. Овие два месеци сите ги добивме сите употребни дозволи, со поддршка на Владата. Во текот на вчерашниот ден ја добивме употребната дозвола, токму затоа денес ја ставаме и официјално во употреба. Поради немање снег, во текот на наредниот период може да се користи за панорамско разгледување, рече Ковачевски.
Министерот Крешник Бектеши потенцираше дека Владата работеше и на патната инфраструктура со цел да се врати епитетот како главен зимски центар во регионот.
-Ние во последните 2,5 години покажавме дека се грижиме за Попова Шапка. Освен жичница имаше реконструкција на патот што ја олеснува можност за посета на оваа дестинација. Бројките покажуваат дека имаме 8 отсто раст во однос на 2018 година кога се во прашање бројот на туристи, ние ќе креираме мерки да овозможиме да има подобра инфраструктура и да влиаје во националната и локалната економија, рече Бектеши.
Жичницата има капацитет од 2.400 патници на час. Ја изгради меѓународно реномираната компанија „Лајтнер“.
А.С
