И вработените во тетовската пошта се приклучија на генералниот штрајк во оваа национална институција. Линеарно покачување на нето платите во износ од 3 000 денари бараат Синдикатот на „Македонска пошта“ и Синдикалната организација на АД „Пошта“.
Штрајкот почна во 8 часот и ќе се одвива на работните места во главната Пошта и низ подружниците низ државата, најави на прес-конференција Боро Велигданов, претседател на Синдикатот на „Македонска пошта“.
Според синдикалните организации, работата на „Пошта“ ќе биде целосно во прекин освен за неопходните активности кои давателите на поштенски услуги мора да ги обезбедат непречено, согласно член 49 од Законот за поштенски услуги и Колективниот договор на ниво на работодавач, и тоа се до прифаќање на барањата.
Согласно Законот за поштенски услуги, вработените имаат обврска да го почитуваат член 49 и да обезбедат прием, сортирање и дистрибуција на поштенски пратки кои се однесуваат на препорачани судски пратки, препорачани пратки од безбедноста и одбраната и одредени други препорачани пратки кои се наведени во законската регулатива.
Одлуката за стапување во генерален штрајк беше донесена на 31-ви минатиот месец, по, како што информираа, неуспешниот дијалог со Управниот одбор на Поштата и Владата и нереализирањето на барањето за повисоки плати.
