Климатските промени и другите проблеми се причина двојно да бидат намалени приносите на мед од едно пчелно семејство, велат производителите, учесници на натпреварот за квалитет на мед во Тетово што денес започна да се одржува на Универзитетот во Тетово во организација на здруженијата „Градот на пчелите“ и „Полошки мед“. Се повеќе пчеларите имаат проблем да произведат мед.
-Просекот од 10 килограми по пчелно семејство што сега го сметаме како добар просек го сметаме, пред 10-20 години бил по 20 килограми од пчелно семејство. Влијанието на климатски промени е еден од најглавните фактори. Специфични проблеми нагло го намалија приносот на мед по пчелно семејство глобално, вели Владимир Антовски, пчелар од тетовско Жилче.
-Влијааат многу фактори, најмногу климатски промени, а потоа и пестициди во земјоделието, дојде и коронавирусот, па беше ограничено движењето поради репроматеријалите кои не се произведуваат тука, рече Дритон Дикена, пчелар.
Слободан Јефтиќ, меѓународен судија за квалитет на мед од Србија потенцира дека во Македонија постои квалитетен мед и дека оваа гранка може и треба да биде водечка гранка за развој на земјоделието.
-Медот од Балканот е најквалитетен во Европа, затоа Германците толку многу го плаќаат за да бидат со поквалитетно здравје. Луѓето комотно да почнат да се занимаваат со пчеларство, пчелата ни е вредно суштество кое помага за опрашување. Земјоделството и пчеларството може да напредуваат во продажба и извоз на мед, изјави Слободан Јефтиќ.
-Ние како пчелари од Македонија учествуваме на многу меѓународни натпревари, а пример во Тузла бевме 40 претставници. Од сите експерти што оценуваа мед, македонскиот мед беше оценет како најдобар во регионот и во Балкан. Веќе го именуваат како „Течен дијамант од Македонија“. Ние имаме квалитетен мед, а што недостига е да излеземе на светскиот пазар. Не може да правиме авиони но сигурен сум дека може да прозиведуваме многу квалитетен мед. Би требало да имаме повеќе соработка и со државните институции и локалната власт со разни мерки и грантови за тие да го развиваат пчеларството затоа што Македонија може да биде светски бренд во пчеларството, истакна Дритон Дикена од пчеларското здружение „Градот на пчелите“.
-Со учество на манифестации за утврдување на квалитет на мед пчеларите добиваат сертификат со кој може да излезат пред купувачите дека е веродостоен, вреден да се конзумира, потенцира Владимир Антовски.
Во државата се бројат околу 242 илјади пчелни семејство кои ги одгледуваат над 6 илјади пчелари.
А.С