Младата режисерка Ана Андонова деновиве во Тетово и Скопје работи на својот прв документарен филм насловен „Лили“ во кој се зборува за млад активист од Азербејџан кој е прогонет од властите и се обидува да живее од уметноста во земјите каде престојува. Лили Назаров бил во Турција, сега е тука па планира да оди во Албанија.
-Низ секоја земја остава по еден свој мурал. Ова е ново за мене, прв документарен филм. Досега работев на играни филмови, работам за прв пат со човек кој не е од оваа земја. Требаше многу да истражувам за да направам добра приказна за него. Мислам дека ќе испадне добра приказна затоа што е таква сама по себе. Екипата која работи на филмот е од Македонија, вели 22 годишната Ана.
Протагонистот Лили Назаров вели дека муралот го претставува општеството во Азербејџан и притисокот од средината со кој се соочуваат тамошните луѓе, особено жените.
-Оваа уметничка работа во средина претставува три жени кои се убиени во Азербејџан оваа година. Тука е 20 годишна девојка која се самоуби поради притисок од фамилијата, има жена трансродово лице како и една жена која е убиена од свекорот. Сакам да ја прикажам нивната борба на сите. Црвениот дел е општеството, во средина се жените кои се страдаат од општеството, објасни Лили Назаров.
Ана филмот ќе го пријави на филмски фестивали. Нејзината работа е помогната од организација во Амстердам Схтифтунг Арт 1, која работи за активизам преку уметност.
-Во Македонија работиме три години со поттикнување учество на млади преку културата за теми како што се еднаквост на половите, човекови права и ЛГБТ. Ние се запознавме со Ана, таа се запозна со Лили, кој дојде овде како мигрант од Азербејџан, изјави Крис Белони од организацијата.
За Андонова ова е осми филм. Минатата година го изработи краткиот игран филм „Малечка“ со шест актери и над 50 статисти, со кој учествуваше на Младински филмски фестивал.
А.С
