Во септември годинава, полициските службеници на Секторот за внатрешни работи Тетово-Полициска станица за безбедност на патниот сообраќај Тетово, на поширокото тетовско подрачје, во 24 засилени акциски и редовни контроли вкупно откриле и законски санкционирале 1621 прекршок или 719 помалку во споредба со истиот период лани.
Во контролните активности, реализирани во текот на минатиот месец, а поради констатирани прекршоци, односно недостатоци, од сообраќај билe исклучени 58 возила, од кои 32 поради истечена регистрација до и над 30 дена, 22 поради утврдена техничка неисправност и 4 поради претовар.
-Во септември, исто така, од сообраќај биле исклучени и 260 возачи, од кои 148 управувале без возачка дозвола, 61 под дејство на алкохол, 35 возачи-почетници кои не се придржувале на законските ограничувања за оваа категорија возачи, 7 со важечка забрана за управување и 9 со несоодветна категорија, информира портпаролот Марјан Јосифоски.
Покрај тоа, во месецот за кој станува збор, времено биле одземени 8 возила со истечена регистрација повеќе од шест месеци, 61 возачка и 44 сообраќајни дозволи, додека тетовската „пајак-служба“ вкупно подигнала 143 непрописно паркирани возила, најмногу во централното подрачје на Тетово.
Минатиот месец, исто така, вкупно била изречена 531 мерка за неприлагодена брзина според условите на патот, односно за пребрзо возење, 36 за недавање предност, односно првенство на пешаци и друго.
