Министерот за здравство д-р Фатмир Меџити и директорот на Клиничката болница во Тетово д-р Плумб Вела одржаа прес конференција на која дадоа повеќе детали за настанот од синоќа кога доктор анестезиолог од тетовската болница снимал пациенти и доктори, а снимката потоа бил објавена на социјалната мрежа „тик-ток“.
-Изразувам големо жалење што еден здравствен работник вака да се однесува. Ми се јави на телефон и началникот на СВР Тетово и ми кажа дека здравствениот работник е приведен и ние понатаму се ќе направиме вакви случаи да не се случат во иднина. Во координација сме со многу други институции и со лекарската комора и јас барав веднаш да му се прекине работниот однос и да се одземе лиценцата за работа на овој доктор, изјави министерот Меџити.
Директорот на Клиничка болница Плумб Вела исто така изрази жалење за настанот и појасни како реагирал кога разбрал за објавената снимка.
-Тоа се случило на одделението за киретажа каде тој работел како анестезиолог. Додека вчера јас бев во Скопје видеото ми го прати еден новинар. Штом го видов видеото веднаш дојдов во Тетово и јас лично, како директор на болницата, случајот го пријавив во полицијата бидејќи станува збор за сериозна работа. За случајот бевме во постојана комуникација со Министерството и министерот, кажа директорот на Клиничката болница Плумб Вела.
