Претседателот на ОК ВМРО ДПМНЕ и советник во Општина Тетово, Ангел Карапетров одржа прес-конференција на која реагираше на владината одлука една од зградите на поранешното медицинско училиште да се даде на трајно користење на Агенцијата за катастар на недвижностите.
-Образованието е најважната алка во една држава. Токму затоа, во образовниот процес треба континуирано да се вложува и истиот да се унапредува за квалитетни генерации и идни успешни граѓани. Но, се чини за политиките на СДС ова воопшто не е важно. Последната срамна одлука на СДС и нивниот коалиционен партнер ДУИ, директно ги погодува токму нашите средношколци. На нашите ученици наместо да им овозможат солидни услови за образувание, тие им ги одземаат просториите за учење! Пред не толку далечно време, токму СДС и тогашниот премиер Заев ветуваше нови простории за тетовските гимназијалци од македонска настава, а сега со скандалозна одлука и без никаква предходна консултација им одзема еден објект од стариот медицински училишен центар, и тоа на само неколку денови пред почетокот на новата учебна година. Ова е срамно и понижувачки. Оваа одлука на Владата СДСМ – ДУИ е удар за тетовското образование. За оваа незаконска и скандалозна одлука ќе ги информираме сите релевантни интитуции и дипломатски претставништа. Јавно ја повикуваме оваа ненародна Влада да престане со нанесување штети, од кои овој пат страдаат нашите ученици! Образованието не смее да се користи за задоволување на нечии страсти и лични интереси. Тоа, нема да го дозволиме, порача Карапетров.
Тој се осврна и на изборите од 20 август.
-Пред само неколку дена имавме локални избори. Ја користам оваа прилика да ги прашам кандидатите за советници на СДС , со кој образ одеа кај тетовчани и бараа гласови, а притоа знаеа за ваквата одлука на нивната влада донесена на само неколку дена пред изборната кампања ? Дали не е ова срамно и лицемерно од нивна страна ? Сега, нека видат сите тие 1900 тетовчани на кого ги дадоа своите гласови ? Исто така, сакам да истакнам дека доколку Владата не ја повлече оваа скандалозна одлука, ќе излеземе на протести заедно со наставниците, учениците и нивните родители, а ќе ги повикаме и сите граѓани на Тетово, истакна Ангел Карапетров.
