Полициски службеници на СВР Тетово, вчеравечер (11 октомври) околу 22 часот и 50 минути во тетовска Мала Речица ги лишиле од слобода М.А.(24) од тетовски Порој и И.А.(31) и М.И.(22) од гостиварско Чегране. М.А. бил затекнат при продажба на кокаин на двајцата чегранци. Подоцна, со судска наредба, извршен е и претрес во домот на М.А., при што биле пронајдени и одземени пари за кои постои сомнение дека потекнуваат од кривично дело. Тројцата се задржани во Полициската станица Тетово и по целосно документирање на случајот ќе биде поднесена соодветна пријава.
Вчера (11 октомври), полициски службеници на СВР Тетово, во месноста „Керамедлија“, атар на тетовско Јанчиште, во нива засеана со пченка пронашле над 150 стебла „канабис сатива“. Дел од стеблата се подигнати за вештачење, а останатите ќе бидат искорнати и уништени. Се расчистува случајот.
Вчера (11 октомври) во 21 часот и 15 минути во тетовско Горно Седларце, полициски службеници на СВР Тетово, со судска наредба, го привеле 23-годишниот Д.С. од ова село за издржување мерка притвор, по што бил спроведен во Казнено-поправната установа Затвор Скопје.
Полициски службеници на СВР Тетово вчера (11 октомври) во 14 часот и 20 минути го привеле 52-годишниот С.Д. од тетовски Чифлик, кој со патничко моторно возило „форд фиеста“ со тетовски регистарски ознаки превезувал огревни дрва без потребните документи. Возилото и дрвата со потврда му се одземени и задржани во Полициското одделение Групчин за расчистување и документирање на случајот, по што против него ќе следува соодветен поднесок.
Вчера (11 октомври) околу 16 часот 20 минути на улица „Киро Ристевски-Дрнц“ го лишиле 34-годишниот И.Е. од Република Турција со времен престој во Тетово, кој половина час пред тоа бил пријавен од неговата 38-годишна сопруга дека претходниот ден физички ја нападнал неа и нивно малолетно дете. Тој е задржан во Полициската станица Тетово за расчистување и документирање на случајот.
Полициски службеници на СВР Тетово вчера (11 октомври) во 21 часот го лишиле од слобода 33-годишниот З.Р. од Тетово, кој непосредно пред тоа бил пријавен од 40-годишниот тетовец В.Т. дека се однесувал агресивно кон него и му се заканувал. Задржан е во Полициската станица Тетово за расчистување на случајот.
Дваесет и четиригодишниот тетовец С.Р. вчера (11 октомври) во 17 часот и 10 минути во СВР Тетово пријавил дека околу 13 часот во близина на крстосницата на улиците „Иво Лола Рибар“ и „Орце Николов“ во Тетово физички бил нападнат од Д.Д. од тетовската населба Дреновец. Се преземаат мерки за расчистување и документирање на случајот.
На 10.10.2023 околу 14.00 часот во СВР Тетово било пријавено дека настанал пожар во нива на стариот пат Тетово – Скопје, на место викано „Деребој“, при што биле зафатени сува трева и 14 сандаци со пчелни семејства, сопственост на Д.Д.(46) од Тетово. Увид бил извршен.
