Универзитетот во Тетово денеска одржа пригодна манифестација по повод 28 години од основањето. Во Ректоратот присутни на манифестацијата беа голем број претставници на академската и научната фела во државата, студенти претставници на извршната и законодавната власт во државата, како и претставници на дипломатскиот кор.
-Овој универзитет е расадник на квалитетни кадри кои успешно се интегрираат во сите сегменти на општеството и голем дел од нив покажувајќи лидерски способности, учествуваат во креирање на позитивни промени и придвижувањето на државата напред. Благодарност до сите кои имаат придонес во основањето на Универзитетот во Тетово и благодарност до сите кои се труделе и се трудат тој да напредува и да прераснува во еден од најсилните столбови на високообразовниот систем во државата и важен фактор за севкупниот општествено економски напредок на државата, рече во пригодното обраќање министерот за образование Јетон Шаќири.
Тој рече дека заврши времето кога наставата се организираше во тешки услови и дека на новите генерации им е значително олеснето студирањето на Универзитетот во Тетово.
-Денеска студии на сите три циклуси се организираат во современ објект, модерни амфитеатри, читални, лаборатории. Универзитетот има добро развиена мрежа на соработка со други образовни установи, со бизнис секторот и разни организации. На располагање се различни видови стипендии за студентите, како и средства за спроведување на научно истражувачки проекти. Најважно, Универзитетот има добро подготвен наставно – научен кадар од кој чест е да се учи и акумулира знаење, нагласи Шаќири.
Потсети дека Министерството за образование и наука неодамна изгради нов студентски дом за потребите на студентите од овој универзитет и по завршување на неколку формалности, тој ќе биде предаден на користење. Како што рече, оваа нема да биде последна инвестиција на државата во универзитет. Државната поддршка од сите аспекти ќе продолжи и во иднина, не само за овој, туку и за сите други државни универзитети, затоа што, немаме друга алтернатива освен да им понудиме квалитетно образование на граѓаните.
