СВР Тетово за изминатите 24 часа бележи приведување за најдена дрога, за пријава на физички напади. Во сообраќајните контроли изречени се 55 казни за возење и зборување на мобилен телефон. Казни се изречени за несоодветен јавен превоз
-Ноќеска (20 јули), десетина минути по полноќ на улица „Благоја Тоска“ во Тетово, полициски службеници на СВР Тетово го лишиле од слобода 18-годишниот М.К. од Швајцарија затоа што кај него била пронајдена и одземена марихуана. Тој е задржан во Полициската станица Тетово за расчистување и документирање на случајот, по што ќе му биде изготвен поднесок.
-Полициски службеници на СВР Тетово вчеравечер (19 јули) околу 22 часот ги лишиле од слобода 71-годишниот З.С. и 70-годишниот М.М. од тетовско Раотинце, кои претходно биле пријавени од 60-годишниот Љ.И. дека по меѓусебна расправија околу 15 часот и 30 минути физички го нападнале. Во нападот, според пријавеното тие користеле дрвен предмет и огнено оружје. Двајцата се задржани во Полициската станица Тетово за натамошна постапка.
-Шеесет и петгодишниот Ќ.Х. од Тетово вчера (19 јули) во 19 часот и 30 минути во СВР Тетово пријавил дека околу 16 часот во близина на место викано „Бањиче“ физички бил нападнат од едно лице, кое го познавал, поради нивни нерасчистени односи. Се преземаат мерки за расчистување и документирање на случајот.
-Во рамките на акциска контрола спроведена вчера (19 јули) од 13 до 18 часот, на автопатот Тетово-Скопје, во тетовско Желино, како и на улица „Илинденска“ во Тетово, полициски службеници на СВР Тетово откриле и санкционирале три патнички моторни возила со тетовски регистарски ознаки кои вршеле јавен превоз без потребните документи: „мерцедес“ управуван од 36-годишниот С.Е. од тетовско Добарце, „мерцедес“ што го управувал 64-годишниот А.Д. од тетовско Желино и „фолксваген голф“ управуван од 60-годишниот С.А. од тетовска Шипковица. По целосно документирање на настаните против тројцата возачи ќе следуваат соодветни поднесоци согласно Кривичниот законик.
-Вчера (19 јули) од 8 до 12 часот полициски службеници на СВР Тетово спровеле акциска контрола со која биле опфатени возачи кои користеле мобилни телефони. При контролата откриени и санкционирани се 49 (ТЕ) и 6 (ГВ) прекршоци, а на возачите им се изготвени поднесоци и ќе се соочат со парична глоба од 40 евра во денарска противвредност. При контролата, исто така, биле санкционирани и 8 (ТЕ) други видови сообраќајни прекршоци.
