Во текот на 2022 година епидемиолошката служба при Центарот за јавно здравје во Тетово бележи 41 лице кои било евидентирано дека има потреба за антирабична терапија откако било нападнато и каснато од бездомно куче, додека во полицијата бележат 54 пријави односно напади од кучиња скитници.
Овие бројки отприлика ја отсликуваат драстичната состојба со напади од бездомни кучиња со кои се соочуваат тетовци. По вчерашната вест дека 40 годишна жена која иако успеала да им избегне на кучиња скитници, при трчањето се сопнала и ја скршила ногата, а ја повредила и раката, многу бројни се дописите до редакцијата и алармирањето дека улиците се небезбедни за движење поради оваа состојба.
Ветеринарите сметаат дека со интензивирање на зимскиот период како и ниските температури бездомните кучиња ќе бидат поагресивни. Тоа го образложуваат со оглед дека кучињата ќе бидат повеќе гладни, па можни се уште повеќе напади и повредени луѓе.
-Оваа ситуација и во цела држава е иста, но во Тетово гледам поголем проблем затоа што немаат ушни маркици, што значи дека не се стерилизирани и се агресивни. Луѓето ги молам да внимаваат од тие кучиња без ушни маркици бидејќи знаат да бидат многу агресивни. Овој момент сега на зима, немаат јадење и ќе бидат уште поагресивни. Општината да најде начин да ги среди овие работи, ние како што ги гледаме има многу кучиња,изјави Рами Селмани, ветеринар.
На последната прес-конференција градоначалникот Биљал Касами информираше дека од август до почетокот на ноември, ново ангажираната служба има заловено и третирано 83 бездомни кучиња.
Луѓето кои се повредни односно каснати и ранети од кучиња скитници, морале да примат вакцина против беснило, серум и вакцина против тетанус. Во текот на 2021 година имало вкупно 65 луѓе кои биле повредени на ваков начин и морале да примаат иста таква терапија.
ас
