Градоначалниците од Полошкиот регион бараат од Министерството за образование да има поголем распуст или онлајн настава за учениците со цел училиштата да немаат високи трошоци за затоплување на училниците и просториите.
За ова се разговараше на денешната седница на Советот за развој на Полошкиот плански регион, а идејата доаѓа од градоначалникот на Гостивар Арбен Таравари кој пред неколку недели ја спомена можноста во изјава за медиумите.
-Бидејќи сметките за електрична енергија се повисоки од минатата година одлучивме како идеја да дадеме зимскиот распуст за децата да трае два месеци- декември и јануари или јануари и февруари, така да децата потоа преку лето да имаат пократок распуст и учебната година да трае до 30 јуни и да почнат 15 август со новата учебна година. Или евентуално трите месеци декември, јануари и февруари да бидат онлајн. Ние сме горе-долу дигитализирани имаме добри искуства во време на пандемијата и зошто да не сега повторно во насока на заштеда на електирчна енергија да се одржи онлајн настава. Ќе треба поддршка од Министерството и ЗЕЛС, а нас не поддржуваат и други градоначалници, изјави Арбен Таравари.
На седницата на Советот на Полошки плански регион се дебатираше и за можноста за нов проект околу менаџирање со отпадот, како и регионалната соработка за справување со кучињата скитници.
ас
