Црквата Свети Мина во тетовска Волковија доби донација од над 20 илјади денари, кои ги даруваа младите од ова место кои парите ги собрааа при традиционалното народно одбележување на Василица-Православна нова Година на 14 јануари кога биле дарувани при посета на куќите низ селото.
Согласно традицијата, од раните утрински часови група на млади маскирани учесници од ги посетуваат домаќинствата, со исполнување на празнични песни и ора посветени на домовите на семејствата. Од домаќините добиваа дарови како пари, месо, ракија, грав, овошје, зеленчук и друго.
-Собраните пари и дарови порано се делеле меѓу учесниците, но овој пат младите решиле да постапат поинаку. Се одлучиле сите собрани пари од над 20 илјади денари да ги донираат за цркваат Свети Мина со цел да продолжи реконструкцијата на православниот храм и дворот. Младите сами дошле на идеја за оваа донација, додека се договарале за маскирањето и учеството на Василица, информираше Сашо Илијевски од црковниот одбор.
Бранко Стефановски, еден од повозрасните луѓе во Волковија информираше дека традицијата за донирање и дарување за црквите е од дамнина, а се негува и сега.
-Традицијата на празнување со маскирање и пеење на песни и посета на куќите ја почнал некој Лазар, пред многу години. Не паметам ни јас. Тогаш се облекувале младите лица како баби и дедовци и така оделе по домаќинствата за да соберат дарови. Сето собрано било дарувано на луѓето од селото кои се соочувале со сиромаштија. Порано имало и палење на оган но тој дел од традиција со години потоа е изоставен. Убаво е што младите ги донираат средствата за продолжување на реконструкцијата на црквата, изјави Бранко Стефановски.
Во 2021 година Љупче и Томче Михајлоски, татко и син кои живеат во Гостивар со сопствени средства и труд ја изградија новата влезна порта со крст за црквата Свети Мина. Членовите на црковниот одбор при храмот Свети Мина одлучиле да се најдат мајстори кои би ја изработиле портата со крст, а двајцата гостиварчани кои потекнуваат од Волковија се понудиле самите да ги изработат како донација за црквата.
ас
