Уметницата Билјана Билбилоска преку самостојна изложба за прв пат ќе претстави дел од своите уметнички дела пред хрватската публика. Од 24 август од 12 септември ќе биде изложени 20 дигитални графики во галеријата „Студио 21“ во Сплит, Хрватска. Самостојната изложба е насловена „Хоризонтала и вертикала“, а графиките се инспирирани од византиската уметност.
-Овие дела комуницираат со минатите времиња и со техниките на старите мајстори живописци. Затоа се толку длабоки, но во исто време и толку едноставни, како прочистени од талогот на историјата. Стилизацијата на византиската естетика е доведена до совршенство на минималистичкиот уметнички потег. Цртежот е остар и прецизен како напукнат кристал. Но графиките се само навидум црно-бели, колоритот е придушен и раскошен, суптилно скриен во енергијата на формата. Тие функциониираат како современи икони“, вели за изложбата академскиот сликар Никола Пијанманов.
Изложбата ја отвори Даниела Павлиновиќ, а куратор е Наталија Челан. Изложбата е поддржана од Министерството за култура на Република Северна Македонија.
Билјана Билбилоска, која потекнува од Тетово, дипломирала и магистрирала на Факултетот за ликовни уметности при УКИМ во Скопје, на отсекот за графика со графички дизајн. Досега имала шест самостојни изложби во Македонија, во Србија, како и многубројни групни изложби во земјава и надвор.
