На манастирската слава во чест на празникот посветен на светиот Наум Охридски Чудотворец, во манастирот посветен на овој македонски и сесловенски просветител на Попова Шапка, беше отслужена света Архиерејска Литургија со која чиноначалствуваше Неговото високопреосвештенство митрополитот Тетовско-гостиварски г. Јосиф, во сослужение на митрополитот Европски г. Пимен и повеќе свештенослужители.
По Литургијата беа прекршени и благословени славските лебови.
Во својата беседа митрополитот г. Јосиф нагласи:
-Денес, наоѓајќи се во дните на Петровиот пост, на овој наш голем празник ќе ја искористам приликата од овој манастир да упатам порака за сите заедно сплотени во христијанска љубов да се држиме до Евангелието и до верата наша православна, која од памтивек ја облагородува душата на нашиот македонски народ. И ние, како и светиот Наум насекаде да ги шириме евангелските морални принципи кои го осветлуваат духовниот мрак, бидејќи само на тој начин можеме да се соочиме со моралниот пад и со хипокризијата на нашето општество. Само на тој начин можеме да ја сочуваме нашата култура, нашата богата традиција и пред сѐ нашето битисување како еден Божји народ. Македонскиот народ е најсилен кога си ги вреднува и негува своите корени и исконски вредности, порача владиката.
Потоа митрополитот посочи дека Македонската Православна Црква-Охридска Архепископија е душата, копнежот и совеста на народот свој.
-Знам дека не е ни најмалку лесно во овој „лукав и прељубодеен“ свет да се живее и да се шири Христовото евангелие, да се гледа долгорочно, да се има трпение и смирение, но ако повеќе се потрудиме тоа е возможно. Во сите тешки моменти и искушенија кои се појавуваат во нашиот духовен раст и подвиг, пред нас да го имаме животот на светиот Наум и да се запрашаме зарем на него му беше лесно да пропатува илјадници километри, да претрпи страданија и мачења од германските свештеници и да доживее гонење заради Христа? Одговорот е дека не му беше ни најмалку лесно. За колку ли негови страдања не знаеме, колку ли денес страда со нас и се моли за нас свесни ли сме? Но за сè мора да се даде жртва. И за таа негова жртва Бог го овенча со светителски венец, наградувајќи го неговиот труд овде на земјата. Затоа драги браќа и сестри, никогаш да не забораваме на светиот Наум, на неговиот труд и дело, на неговите подвизи и совети. На едно место, деновиве прочитав еден текст за четирите завети на денешниот светител. Тој пред да се упокои на своите ученици им ги пренел следните четири совети и зборови: разбудување, покајание, очистување и причестување. Всушност тој им ги пренел четирите скалила на патот кон спасението. И јас ништо друго повеќе не ви би пренел освен тие четири завети, кои треба секој ден да ги поминуваме. Затоа почесто да се сеќаваме на светиот Наум и да се молиме да Го моли за нас Христа нашиот Спасител, сега и секогаш и во сите векови. Амин, истакна митрополитот.
