Организацијата Хрватски Форум информира дека за прв пат беше организирана КРО (CRO) Академијата со околу 30 учесници од четири градови од Македонија, како и гости од гимназијата „Фран Галовиќ“ од Копривница. Преку различни активности, предавања и квизови учесниците имаа можност да се запознаат со нови теми, настани и личности поврзани со Хрватска, историјата, правото и културата и нивната поврзаност со Македонија и македонскиот народ.
-На академијата беа одржани вкупно седум предавања и презентации на различни теми: копривничка гимназија (Вјекослав Роботиќ), доаѓањето на папата во Македонија (Даријан Сотировски), славонски властелинства во 18 и 19 век (Марко Павелиќ), Хрвати – основачи на Медицинскиот факултет во Скопје (Симона Копривњак), локална, регионална самоуправа и жупании (Марко Видачек), Дубровничка република (Љубиша Марковиќ) и брендирање на МХД во Македонија и Шарам (Александра Новеска), информираа од Хрватски форум.
Воведното предавање како домаќин, го одржа дизајнерката од брендот „Шарам“, Александра Новеска, која веќе подолг период работи на активна промоција на Шар Планина.На академијата учесниците се запознаа повеќе и со ликот и делото на ликовниот уметник Томислав Кризман кој на почетокот на минатиот век има направено две слики и од Тетово, од кој на едната се некогашните два бреста, како и од другите македонски градови.
Како визуелен мотив на Академијата послужи една разгледница со Попова Шапка испратена во 1965 година која патувала на релацијата Тетово – Осиек, објавена во книгата „Македонија така далечка а така блиска“ на авторот Драгољуб Силјановски кој живее во Хрватска. На академијата беше потсетено и за првата тетовска вајарка Борка Аврамова, авторка на Жената борец во Тетово, која завршува академија во Загреб а потоа и останува да живее и твори во Хрватска. Учесниците се потсетија на издавањето на Зборникот на Миладиновци во Загреб и на делото „Бели мугри“ во Самобор.
На академијата учесниците подетално се запознаа и со двете дигитални платформи кои беа објавени оваа година, Архивот на Хрвати во Македонија (www.arhivhr.mk) и информативната платформа www.croatica.mk.
ас
