Во рамките на акциската контрола спроведена вчера (25 април) од 5 до 10 часот, полициски службеници на СВР Тетово, на улица „Браќа Миладинови“ во Тетово, откриле и законски санкционирале две патнички моторни возила со тетовски регистарски ознаки: „хундаи“ што го управувал 62-годишен тетовец и „форд транзит“ управуван од 54-годишник од тетовска Брвеница, а кои не ги поседувале потребните документи за вршење на јавен превоз. По документирање на случајот против нив ќе следуваат поднесоци, информираше денеска СВР Тетово.
Полициски службеници на СВР Тетово вчера (25 април) во периодот од 8 до 20 часот спровеле повеќе контролни активности за брзина со која се движат возилата, а во рамките на кои биле изречени вкупно 65 мерки (ТЕ-54 и ГВ-11). Од нив, 48 мерки (ТЕ-37 и ГВ-11) се однесувале на пречекорувања на максимално дозволената брзина надвор од населено место, од кои 3 (ТЕ) за над 70, а 8 (ТЕ) од 50 до 70 километри на час.
Покрај ова, санкционирани се и 17 пречекорувања (ТЕ) на пропишаната брзина во населено место, како и 12 други видови сообраќајни прекршоци (ТЕ-8 и ГВ-4). На сите прекршители им се изготвени соодветни поднесоци и тие ќе се соочат со предвидените парични глоби, а екстремно пребрзите возачи и со времено одземање на нивните возачки дозволи од три месеци до една година.
Секторот за внатрешни работи Тетово со апел до возачите да бидат максимално внимателни поради влажните коловози на подрачјето и да ја прилагодат брзината според условите на патот, со што ќе придонесат за нивната и за безбедноста на другите учесници во сообраќајот.
