Нова надеж дека ќе добијат асфалтиран пат до нивното село мештаните од Луковица, Општина Желино имаат сега имаат откако со владина одлука е извршена прераспределба на средства од Буџетот наменети за асфалтирање на делницата.
Според одлуката средствата се обезбедени во пoтпрограма 20-Сообраќај и комуникации, ставка 488-Капитални дотации до Единици на локална самоуправа во Буџетот на Министерството за транспорт и врски за 2022 година. Според истата одлука Општина Желино ќе ги добие овие средства па добива и задолжение да достават извештај за наменско користење на средствата до Министерството за транспорт и врски заклучно со месец декември 2023 година.
Ацо Спасеновски, претставник на селото од месната заедница и црковниот одбор вели дека станува збор за сума од 15 милиони денари (околу 240 илјади евра).
-Ние сме многу задоволни. Информацијата ги израдува жителите на село Луковица и многу други пријатели што се на селото. Со правењето на патот од месност Крстец-село Луковица, ќе се заврши долготрајно барање на иселениците и жителите од селото 30 години, ќе се исполни желбата за правење на пат од 5,5 километри. Средствата се обезбедени, се чека на пролет да се почне со тие средства што се обезбедени од Владата, изјави Спасеновски.
Луковица е единственото село кое нема асфалтиран пат во тетовскиот регион. Со оваа промена би имало можност повеќе за развој на сточарството, рурален и планински туризам, вели Славче Момировски, уште еден претставник на месната заедница.
-Со патот ќе има просперитет, ќе се прават нови куќи, ќе има доста народ. Нема да биде празно. Имаше многу повеќе, но поради немање на пат се иселуваа. Имаше и фарми, четири фарми се тотално иселени. Сега може обратно повеќе фарми да се отворат. Има повеќе заинтересирани и ангажирани што може да дојдат и да инвестираат во селото, изјави Момировски на средба со новинарите.
Во 2020 година мештаните самите се организираа, собраа и платија речиси шест илјади евра за проектната документација со геодетски елаборат за патот што треба да се асфалтира. Досега три такви проекти сами ги плаќале (1974 година, во 2000 година и 2020 година)
Од Тетово кон Луковица се може да се оди преку автопатот Тетово -Скопје или регионалниот пат Тетово-Групчин. После Групчин има асфалтиран пат се до Седларево. На половина од тој пат се наоѓа месноста Крстец или крстосница од каде има земјен пат од 5,5 километри се до Луковица.
ас
