Министерот за внатрешни работи Оливер Спасовски и одржа работна средба со раководствата на СВР Тетово, СВР Охрид, како и Регионалниот центар Запад за да лично се запознае со сработеното во 2022 година и постигнатите резултати.
Тој пред медиумите по средбата, рече дека бил информиран за безбедносната состојба на подрачјата на СВР Тетово, СВР Охрид и Регионалниот центар Запад, состојбите со криминалитетот, како и активностите кои се преземаат, во насока на намалување на стапката на криминалитет, одржување на поволен јавен ред и мир, безбеден патен сообраќај и превенција.
-На територијата на СВР Тетово во периодот јануари – ноември 2022 година, споредбено со истиот период во 2021 година, вкупниот криминалитет бележи намалување за 7 проценти. Она што посебно би сакал да го истакнам и што бездруго охрабрува е дека севкупната ефикасност во откривачката функција годинава е значително зголемена и се движи околу 78 проценти. Позитивен тренд во 11-те месеци годинава е присутен и во областа на безбедноста во сообраќајот. Во овој период санкционирани се 24.304 сообраќајни прекршоци, од кои најбројни се за брзо возење (3602), а за одбележување е и податокот дека намален е бројот на сообраќајни несреќи за три проценти што се должи на континуираните акциски контроли, истакна Спасовски.
Министерот рече дека зголемениот буџет за МВР ќе значи континуитет во унапредување на условите за работа. Во одговорот на новинарско прашање тој рече дека тоа е добра работа затоа што за подобрувањето на капацитетите во безбедносниот сектор е потребно повеќе време.
-Важно е дека за Владата безбедносниот сектор е приоритет. Често напоменувам дека за безбедносниот сектор, за одбрана и заштита, за здравството, не треба да разговараме само кога имаме само криза бидејќи ни се случувало, ако има Ковид,ајде ќе ги јакнеме капацитетите за здравство. Ако имаме пожар ајде сега ќе разговараме за противпожарни бригади. Ова мора да се решава во континуитет. Да се ствараат услови бидејќи и кадар и опрема не е нешто што можете вие за еден ден да го обезбедите. Затоа е важно што таа порака Владата ја прифаќа тоа е јасна политичка волја изразена во овој дел и затоа се зголеми буџетот за шест проценти, изјави Спасовски од Тетово каде беше на регионална средба со раководствата на неколку сектори при МВР.
Тој најави дека по реконструкција на поголем дел од објектите на подрачјето на СВР Тетово останува само еден објект во Гостивар, а се планира за нови простории за полицијата во Чегране.
На новинарско прашање дали со негов потпис, како се објави ВМРО ДПМНЕ, е назначен Бесфор Аме, кој одлежал затвор за криумчарење, на командирска позиција на ГП Блато Спасовски одговори дека на ниту еден граничен премин кој е во РЦ Запад таков командир со таков име нема.
