Театарската претстава „Црвенкапа“ на Летечка театарска трупа ја доби наградата за најдобра претстава во категоријата театар за деца и младинци на 60. Драмски аматерски фестивал – Кочани.
Доделувањето на наградите се одржа синоќа на платото пред Центарот за култура „Бели мугри“ во Кочани. Претставата „Црвенкапа“ на репертоарот на фестивалот беше во петокот, а актерскиот тим прикажа филигранска игра што допре до срцата на детската публика.
-Наградата се доделува за иновативниот пристап во адаптацијата на бајката и за успешно избегнатото насилство, на што инстистира оригиналниот текст, со суптилна разрешница на самиот крај, образложи тричленото жири.
Во „Црвенкапа“ играа Матеј Печеновиќ, Марко Ристоски, Ивана Давидовска, Марија Јовановска, Анастасија Кузмановска, Никола Стојановски и Петар Симоски.
-Се покажа дека она што го работиш со леснотија и љубов, ослободувајќија сета фантазија и креативност, секогаш раќа убави и слатки плодови каква што е нашата врзија на ‘Црвенкапа’. Многу ми е мило што претставата лесно допре до детските срца и што пораките од неа ќе останат долго во детското сеќавање, вели режисерот Зоран Јованоски.
Летечка театарска трупа годинава одбележува 15 години постоење и веќе работи на нови театарски претстави што ќе бидат прикажани во текот на оваа година.
Гран-при “Васил Ќортошев” за најдобра театарска претстава во целост го доби изведбата на драмскиот текст „Тунел” на театарската група „Годо” од Кочани, во режија на Кристина Атанасова Арсова. Покрај домашни, на фестивалот настапија и театарски групи од Србија и Хрватска.
