Во изминатите нешто помалку од два и пол месеци од оваа година, на подрачјето на Секторот за внатрешни работи Тетово вкупно се изречени 2129 мерки за неприлагодена брзина, односно пребрзо возење (ТЕ-1453 и ГВ-676).
Најголемиот број од мерките се однесувале на пречекорување на максимално дозволената брзина надвор од населено место, меѓу кои и за пречекорувања над 50 и 70 километри на час, претежно регистрирани на автопатот Гостивар-Тетово-Скопје и магистралниот пат Гостивар-Кичево. На сите возачи-прекршители во овој период изготвени им се законски предвидените поднесоци и тие ќе се соочат со парични глоби и други мерки.
Паричните глоби за овој вид сообраќаен прекршок се движат од 45 до 400 евра во денарска противвредност. За оние кои пречекориле многу повеќе од пропишаната брзина ќе следи и времено одземање на нивните возачки дозволи од три месеци до една година.
-Секторот за внатрешни работи Тетово континуирано спроведува вакви контроли, не само на автопатот и тетовските и гостиварските улици, туку и на околните регионални патишта, во различни временски периоди. Секторот за внатрешни работи Тетово повторно со апел до возачите да не брзаат и да се изложуваат на опасност да предизвикаат сообраќајни несреќи, во кои ќе ги доведат во прашање сопствените и животите на други учесници во сообраќајот, информира Марјан Јосифоски, портпарол на СВР Тетово.
Полициски службеници на СВР Тетово вчера (8 март) од 16 до 22 часот на тетовско-гостиварското подрачје спровеле контрола на возачи, дали и колку од нив управуваат под дејство на алкохол. При контролата биле откриени и санкционирани 2 возачи (ТЕ) кои управувале возило под дејство на алкохол, од кои кај 1 биле измерени над еден и пол промили алкохол во крвта. Двајцата веднаш се исклучени од сообраќај и изготвени им се предвидените поднесоци, а со поднесоци заокружени се и 30 други видови сообраќајни прекршоци.
