На избирачките места во Тетово нема информативни натписи за тоа кои улици спаѓаат во тоа избирачкото место на македонски јазик. Претседателот на Државната изборна комисија Александар Даштевски кој претпладнево беше во Тетово на увид како се спроведува гласањето како технички пропуст го оцени ова неистакнување на информации на македонски јазик.
-Имаше мали технички пропусти на кои им укажавме на избирачките одбори. Некои се исправија веднаш. Се функционира во ред. На некои места имаше објавени списоци само на албански, немаше на македонски. Тоа е технички пропуст и им укажавме дека доколку има, да ги закачат да не биде пропуст да биде двојазично. Тоа се мали детали што ги утврдивме, изјави Даштевски.
На новинарско прашање зошто необјавувањето на списоците со улиците на македноски јазик се смета за технички пропуст, а не човечки фактор и неодговорност, Даштевски рече дека тука нема одговорност.
-Ги имаме, сме ги испечатиле и сме ги донеле. При примопредавање на материјалите, дали се примопредадени или не, не знам, или пак се примопредадени, а се ставени во кутија,заборавиле да ги истакнат. Нема одговорност, треба да ги закачат, им реков сега да ги закачат. Бидејќи нели тоа е пропишано да биде двојазично, изјави Даштевски.
Попладнево на гласачките места ги немаше списоците со улици истакнати на македонски јазик. Тие се потребни бидејќи во еден објект има повеќе места каде се гласа па е важно да се најде описот на избирачкото место односно кои улици спаѓаат во кое место.
Иако Даштевски најави дека ќе се истакнат овие информации секретарот во Општинската изборна комисија Назми Даути со сосема друго образложение.
-Описот на избирачки места не е доверлив изборен материјал и не влијае на процесот на избори. Ние кажавме дека е технички пропуст, ОИК три дена работи го спрема изборниот материјал и во некои гласачки места пропуст сме испуштиле на македонски јазик. Каде имаше интервенција на претседатели на избирачки одбори да се тргне и тоа на албански јазик бидејќи тоа не е доверлив материјал за да може да влијае врз изборниот процес, изјави Даути.
До 17 часот бележиме 27.79 % отсто излезност или 23.366 граѓани дошле да гласаат. Во Тетово право на глас имаат 84. 071 гласач, на 117 избирачки места .
