Денеска (19 април) судија во претходна постапка на Основниот суд Тетово на 21-годишниот Л.С. од тетовско село му определи осумдневен притвор и набргу ќе биде спроведен во Казнено-поправната установа Затвор “Скопје” во Скопје за издржување на мерката.
Тој се сомничи дека извршил физичко насилство врз неговата 19-годишна невенчана сопруга и за нејзинопротивправно лишување од слобода Според пријавеното,тој повеќе пати физички ја напаѓал, а во нападите повремено користел и метален предмет. Тој вчера (18 април) околу 14 часот и 50 минути беше лишен од слобода и во координација со Јавен обвинител, задржан е во Полициската станица Тетово за расчистување и документирање на случајот.
Основното јавно обвинителство Тетово поведе постапка поради основано сомнение дека сторил продолжено кривично дело – Телесна повреда од член 130 став 2 во врска со став 1, како и кривично дело – Противправно лишување од слобода согласно 140 став 2 во врска со став 1 од Кривичниот законик.
-Почнувајќи од декември 2022 година, осомничениот вршел семејно насилство врз 19-годишна жена со која живеел во вонбрачна заедница. Жртвата подолг временски период ја држел заклучена во една соба и секојдневно физички ја малтретирал, нанесувајќи и бројни телесни повреди. Жената искористила прилика кога во еден момент осомничениот ја заборавил отклучена вратата, успеала да побегне и настанот го пријавила во полиција, информираше Обвинителството.
Надлежниот јавен обвинител до судијата на претходна постапка од Основниот суд во Тетово доставил предлог за определување мерка притвор. Судијата го прифатил предлогот на обвинителството и со решение му определи притвор на осомничениот во траење од осум дена.