На подрачјето на СВР Тетово вчера (29 мај) од 15 до 20 часот спроведена е акциска контрола за неправилно и непрописно престигнување на возилата, во која вкупно се откриени и санкционирани 32 прекршоци (ТЕ-15 и ГВ-17). Најголемиот број од прекршоците (ГВ-16) се однесувале на престигнување на забранети места, (ТЕ-15) на други начини на неправилно престигнување и 1 (ГВ) на престигнување на возила во колона.
На прекршителите изготвени им се законски предвидените поднесоци и тие ќе се соочат со парични глоби кои за овој вид прекршоци се движат од 45 до 250 евра во денарска противвредност. Оние, пак, кои престигнувале на „полна линија“, на непрегледни кривини или во долга колона од возила ќе се соочат и со времено одземање на возачките дозволи од три месеци до една година. При контролата, исто така, санкционирани се 7 други видови сообраќајни прекршоци (ТЕ-6 и ГВ-1).
Секторот за внатрешни работи Тетово со повторен апел до возачите да бидат докрај внимателни – како и каде престигнуваат и да не ја доведуваат во ризик сопствената и безбедноста на другите учесници во сообраќајот.
Посебно им се укажува да не престигнуваат на „полна линија“ и на непрегледни кривини. Им советува и да не возат пребрзо, зашто на подрачјето веќе се чувствува зголемена сообраќајна фрекфренција, пред се на автопатот Гостивар-Тетово-Скопје и магистралата Гостивар-Кичево, но и на околните регионални патишта.
