Привлекување на работници од странство или доквалификација на домашните работници треба да се прави за да не се влоши состојбата со недостиг на работен кадар, порача од Тетово, Фатмир Битиќи заменик- претседателот на Владата задолжен за економски прашања по посетата на компанијата за производство на стакло „Глас Флекс“ која работи во склоп на тетовската технолошко-индустриско развојна зона. Ова треба да се прави за да македонското стопанство биде конкурентно поради новата ера на индустријализација, рече тој.
-Не можеме да останеме да нашите стопанственици останати неконкуретни. Кога другите земји во регионот па и во европска унија го прават истото, во Србија, Албанија, Црна Гора, Босна па и Косово веќе има работна сила која што доаѓа од дали е од регионот или од далечните региони, затоа што компаниите мора да забрзаат во креирање на својата конкурентност и нормално зафаќање на новите новите пазари. Ако ова не го направиме за две до три години, за жал ќе биде уште состојбата потешка затоа што доста од компаниите ќе треба да затворат затоа што не можат едноставно да издржи и затоа велиме дека евентуалниот увоз тоа го викаме либерализирање на пазарот на труд овозможува да се зголеми конкурентноста на нашите компании за да креираат нови работни места, а секако нашите граѓани секогаш ќе бидат на првенствено место. Но заедно со нив треба да работиме на нивна доквалификација, истакна Битиќи.
Менаџерот на фабриката Гоце Пешов посочи дека иако имаат добри плати не можат да се најдат работници, особено квалификувани кадри. Тој вели дека помошта која што ја дава државата треба да се насочи и кон оваа област.
-Имаме доста проблеми со обучени кадри кои што во моментот недостасуваат во нашата држава, така да сме спремни секогаш за нови кадри- оператори кои што може да работат на ваков тип на машини. Дури и овде очекуваме некаква помош од државата којашто може да делува на носење, кадри и од странство по потреба. Ние имаме во моментот околу 60 вработени, а на годишно ниво имаме потреба од зголемување на работната сила од 25 посто. Сите оператори кои што се на машините се обучени, меѓутоа сепак потребно е уште обучени кадри кои што треба да работат за да можеме да работиме и во повеќе смени, истакна Гоце Пешов.
Заменик претседателот Битиќи рече дека ќе мора да се работи на преквалификација, на работната сила за да одговара на новите текови во економијата и индустријализацијата.
-Само за за споредба 57 посто од невработените регистрирани како активни баратели на работа сила во Агенцијата за вработување се со незавршено или со основно образование. Над 17 посто се со незавршено или завршено средно образование, тоа не носи до скоро 75 посто од активните баратели на работна сила, кои што имаат образование до средно образование. Со нив треба да работиме на реквалификација или и до квалификација за одредени работни работни места, рече Битиќи.,
Претставникот на Владата потсети дека на крајот на 2022 година се исплатени рекордни 23 милиони евра државна поддршка кон 410 компании.
