Во Тетово вчера беше промовирано Здружение за граѓански активизам „За заедничка иднина Тетово“ кое ќе го предводи Небојша Захариески. Здружението во Тетово е четврто по ред кое се формира во неколку градови низ Македонија кои ќе соработуваат со слична идеја, а со долгорочна намера и за формирање на политички партија. „За заедничка иднина Тетово“ ќе соработува со Здружението За наше Куманово каде промотор е тамошниот градоначалник Максим Димитриевски, а вакви здруженија има и во Прилеп и Крушево.
-Ова е здружение од слободумни граѓани, самомислители, доволно свесни кои имаат желба самите да се организираат на локално ниво односно на регионално ниво, на ниво на Полошки плански регион.Во Куманово прво се формираше Здружението. Таму е промотор Максим Димитриевски актуелен градоначалник од Куманово и од таму потекна целата идејата. Исто така на регионално ниво оваа идеја потекнува од регионот од Босна, Црна Гора, Албанија, па и Србија и Косово и тука се јавуваат многу здруженија и движења кои имаат за идејата да дадат нов правец во движењето на политичките односи во своите земји за да регионот тргне напред да се развива. После распад на Југославија овој регион остана неинтегриран и каска наназад, изјави Небојша Захариески.
Тој вели дека здружението е отворено за сите заинтересирани граѓани кои се залагаат за нов политички концепт.
-Сите граѓани кои имаат такви идеја и сметаат дека можат да придонесат да се направи поинаков концепт, не како до сега на политичките актери и невладини кои што работеа, ад хок без идеи со доста импровизација и затоа се резултатите назад. Здружението е отворено за секој што има намера, не мора да бил политички определен може да биде неутрален, доволно е да има добра идеја, добра мисла, рече Захариески.
За долгорочната намера за формирање на политички субјект ќе се одлучува во текот на наредната година.
-Во 2023 година ќе одлучат активистите, граѓаните и членовите доколку има расположение можно е да се соединат во еден сојуз на национално ниво да се здружат како би квалитетно настапиле на наредните избори. Сега за сега ние претставуваме едно Движење во Македонија и така ќе биде сигирно до наредните избори. Понатаму според позитивните законски прописи ќе се одлучи како ќе се продолжи од формален аспект дали политички ќе се регистрира или така како движење ќе продолжи да делува, посочи Захариески.
На вчерашната промоција покрај Захариески, во Тетово се обратија претседателите на здруженијата, Димитар Ќосе од Крушево, Емил Јаневски од Прилеп, Даниел Стојчевски од Куманово и кумановскиот градоначалник Максим Димитриески.
