Полициски службеници на Секторот за внатрешни работи Тетово вчера од 15 до 18 часот спроведоа акциска контрола на возила-дали имаат вградено и користат фолии, светлосни и звучни знаци. Седум возачи ќе треба да платат глоби од по 250 евра.
-При контролата, откриени се седум прекршоци кои се однесувале на непрописно поставени фолии на предните стакла на возилата. На сите возачи-прекршители изготвени им се поднесоци и тие ќе се соочат со парична глоба од 250 евра во денарска противвредност, а веднаш ќе треба и да ги отстранат фолиите, информира Марјан Јосифоски, портпарол на СВР Тетово.
Покрај оваа контрола, вчера во Тетово реализирани се и повеќе активности за поголем ред и безбедност со паркирањето. Санкционирани и од „пајак-службата“ подигнати биле 23 непрописно и погрешно паркирани возила.
-Ваквите активности наредниве две недели значително ќе се интензивираат и ќе бидат главен приоритет на тетовската Полициска станица за безбедност на патниот сообраќај. До сопствениците на моторни возила се апелира уште еднаш да не ги оставаат каде ќе стигнат и да ги паркираат само на наменски определените места.Посебно им се советува да не ги паркираат во таканаречени „двојни редови“ и да го попречуваат нормалното и безбедно движење на другите учесници во сообраќајот, порача портпаролот Јосифоски.
