Општина Тетово доби годишен план за вработувања со кој во 2023 година во општинската администрација ќе има можност работа да добијат уште луѓе. Планот беше изгласан и одобрен од мнозинството на третата седница на Советот денеска, на што му претходеше политичка дебата.
Од советничката група на ДУИ ја критикуваа оваа одлука прашувајќи го мнозинството предводено од Движење Беса зошто се зголемува бројот на нови вработени, за што сегашното раководството ја обвини претходната власт.
-Излегува дека Општина Тетово има потреба да вработува нови луѓе иако има 350 лица со решение. Ја оптоварувате општинската администрација со нови вработувања, а ние знаеме дека имате и нови вработувања со договор на дело, посочија од советничката група на ДУИ.
Претседателот на Советот Бесар Дурмиши образложи дека оваа одлука е техничка работа и законска обврска доколку општината сака да вработи нови административци. За одговор се јави и градоначалникот Биљал Касами кој рече дека општината има привремени вработувања пред се на експерти.
-Тоа се привремени вработувања со придонеси за луѓе кои се експерти пример во областа на урбанизамот. Ние нема да продолжиме со практиката да се вработуваат партиски милитанти, рече Касами од говорницата.
Претседателот на Советот Дурмиши во изјава за медиумите рече дека годишниот план се прави со цел да се проектираат можните вработувања во општината, а можно е тие и да не се остварат.
-Тоа е превидено законски да помине, го бара Министерството за информатичко општество и администрација. После ако треба да се вработат луѓе пак треба Општина да поднесе барање до Министерство, ова е како документ да помине и да се поднесе во Министерство. Нема нови вработувања, но ако има потреба општината ќе мора да вработи според таа програма каде има 23 предвидени работни места. За нив според балансерот 16 места се за Албанци, шест за Македонци и еден за Ром. Ако општината има потреба ќе поднесе пак барање до Министерстворо да даде согласност и после се отвора огласот, изјави Дурмиши.
Во годишниот план се опфатени и пензионирања, унапредувања и превземања на вработени. На третата седница има 41 точка, а ќе се расправа два дена.
ас
