Kандидатот за советник на советничката листа на СДСМ и коалицијата Стојанчо Трипуновски во изјава за медиумите ги потенцираше заложбите за инфраструктурни проекти како дел од претходната локална власт. Тој најави дека во идниот совет ќе се залагаа за нови проекти.
-Преуредувањето на кејот на нашата Пена, каде истата доби свој препознатлив изглед и убавина со комплетното осветлување и кој тетовчани можат да го користат во слободното време за спорт и рекреација, е само еден од многуте проекти, кои ги реализиравме како дел од претходната локална власт. Пробивањето на булеварот Благоја Тоска, реконструкција на улицата Страшо Пинџур, решавањето на горливиот децениски проблем со реконструкцијата на улицата Гоце Делчев, до пробивањето на булеварот Видое Смилески Бато и реконструкција на главната улица во с. Сараќино, се само дел од инфраструктурните проекти, кои со помош на Владата, предводена од Социјалдемократскиот Сојуз на Македонија беа реализирани за унапредување на локалната инфраструктура за граѓаните на Општина Тетово, посочи Трипуновски.
Тој потсети и на целосното реконструирање на патот Тетово-Попова Шапка, за што рече дека веќе ја покажуваат својата инфраструктурна придобивка, како за општината, така и за целата средина, правејќи ја подостапна за местата кои се поврзуваат.
-Важно е да се напомене и планираната реализација на повеќенаменското спортско игралиште во населеното место Сараќино, чие отпочнување на изградба ќе започне за скоро време и за кое веќе се обезбедени средства од Агенцијата за млади спорт. Како кандидат за советник од листата на СДСМ и Коалицијата „Најдоброто за Тетово“, можам со сигурност да кажам дека сите овие досегашни проекти, нè охрабруваат од вас да ја добиеме поддршката за овие вонредни локални избори, рече Трипуновски.
Кандидатот за советник ги повика граѓаните во сабота на 20 ти август да гласаат за подобро, модерно, европско Тетово.