Секторот за внатрешни работи Тетово информираше денеска дека презема координирани превентивни и други мерки, навреме да се пресретнат можните причини за пожари на отворен простор.
Ова, според СВР Тетово е затоа што поединци меѓу земјоделците при актуелните подготовки за претстојната пролетна сеидба повторно ги палат стрништата и сувата вегетација (трева, жбунови и слично) и потоа заминуваат од нивите и огновите ги оставаат без контрола.
-Секторот за внатрешни работи Тетово уште еднаш апелира до земјоделците, но и до сите други граѓани да бидат докрај внимателни ако се движат или работат во полето и посебно да не палат огнови, кои брзо можат да се прошират, особено ако времето е ветровито, какво што впрочем беше изминатиот викенд. Зашто, во спротивно предизвикувачите на пожар на ваков начин ќе се соочат со ригорозни законски санкции, односно со соодветни поднесоци и со можни затворски казни од 6 месеци до 8 години, зависно од видот на пожарот и другите околности и последици, информира Марјан Јосифоски, портпарол на СВР Тетово.
Од полицијата велат дека во наредниот период ќе бидат засилени и планираните контролни активности на поширокото подрачје.
