Секторот за внатрешни работи Тетово со апел до сопствениците на стари, хаварисани возила да ги отстранат од јавни сообраќајни површини, зашто неретко го попречуваат нормалното и безбедно движење на учесниците во сообраќајот, други возила и пешаци. Ова, пред сѐ се однесува на возила оставени на коловоз, тротоари или на бекатонски патеки пред станбени згради, куќи и други објекти.
Деновиве, инаку значително зголемен е бројот на возила во Тетово и Гостивар, кој наредниве денови уште повеќе ќе се зголеми, а што може да предизвика сообраќајни мешаници на одредени улици и несакани последици од истите. СВР Тетово очекува дека и локалните самоуправи, координирано со нивните инспекциски служби, непосредно ќе ги подржат активностите за отстранување на хаварисаните возила кои, покрај другото, создаваат и голема нехигиена, но и го нагрдуваат вкупниот амбиент на просторот.
Секторот за внатрешни работи Тетово уште еднаш ги потсетува сопствениците на моторни возила и да не ги паркираат каде ќе стигнат, а особено не во зона на крстосници, во зелени површини и во таканаречени „двојни редови“. И не само тоа, туку и да не создаваат преголема бучавост, посебно мотоциклистите, да не чкрипат со пневматиците на кружни токови и во целост да се придржуваат на сите сообраќајни правила и прописи.
