Секторот за внатрешни работи Тетово деновиве со зголемен интензитет реализира бројни контролни активности за поголем ред и безбедност во сообраќајот, каде веќе се чувствува забележително зголемена динамика.
Вчера (22 јуни) од 10 до 14 часот спроведена е акциска контрола на возачи, дали и колку тие им даваат предност на пешаците, односно дали ги пропуштаат на обележани пешачки премини или на други начини. При контролата биле откриени и санкционирани 17 прекршоци (ТЕ-16 и ГВ-1). Најголемиот број од нив се однесувале на непропуштање на обележани премини (15). На сите возачи-прекршители изготвени им се поднесоци и ќе се соочат со законски предвидените парични глоби кои за ваквите прекршоци се движат од 200 до 250 евра во денарска противвредност, а за некои од возачите ќе следува и мерка-времено одземање на возачките дозволи од три месеци до една година.
Секторот за внатрешни работи Тетово со уште еден апел до возачите секогаш да внимаваат и да им даваат предност на пешаците, а пешаците да ги минуваат улиците таму каде што тоа е дозволено и да не се изложуваат на опасност поради непрописно движење да ги удри некое возило. Ова, дотолку повеќе што минатата година дури половина од човечките жртви во сообраќајните несреќи на поширокото тетовско подрачје биле токму пешаци.
