На тетовските патишта и улици минатиот месец (август) полициските службеници на СВР Тетово изрекле вкупно 633 мерки за неприлагодена брзина според условите на патот, односно за пребрзо возење.
Најголемиот број од мерките се однесувале на пребрзо возење надвор од населено место и пред се на тетовскиот дел од автопатот Гостивар-Тетово-Скопје. Зависно од големината на пречекорувањето на брзината, на прекршителите им се изготвени законски предвидените поднесоци и тие ќе се соочат со парични глоби кои за овој вид прекршок се движат од 30 до 400 евра во денарска противредност.
-Вакви мерки ќе се преземаат и во наредниот период, дотолку повеќе што и во август најчеста причина за близу половина од случените сообраќајните несреќи(33) била неприлагодената брзина. Она што охрабрува, меѓутоа е дека минатиот месец намален е вкупниот број несреќи за 5, а бројот на повредените лица речиси за 30. Во овој период, инаку регистрирани се две човечки жртви, информира Марјан Јосифоски, портпарол на СВР Тетово.
Секторот за внатрешни работи Тетово овој месец уште повеќе ги интeнзивираше превентивните и контролните активности на поширокото тетовско подрачје, каде поради почетокот на новата учебна година се чувствува зголемена раздвиженост на градските улици, но и на околните регионални и локални патишта. Главни приоритети во септемвриските контроли ќе бидат брзината, техничката исправност на возилата кои вршат јавен превоз на патници и паркирањето во Тетово, а ќе продолжи да се санкционира и управувањето без возачки дозволи и под дејство на алкохол.
