Минатиот месец (февруари) полициските службеници на Секторот за внатрешни работи Тетово-Полициска станица за безбедност на патниот сообраќај Тетово, на поширокото тетовско подрачје, во 24 локални, засилени акциски контроли и редовни активности вкупно откриле и законски санкционирале 1755 различни видови прекршоци.
Во февруарските контролни активности, а поради констатирани прекршоци, односно недостатоци, од сообраќај билe исклучени 46 возила, од кои 24 поради истечена регистрација до и над 30 дена, 19 поради утврдена техничка неисправност и 3 поради претовар.
Во овој период, исто така, од сообраќај биле исклучени и 237 возачи, од кои 135 управувале без возачка дозвола, 59 под дејство на алкохол, 21 возач-почетник кој не се придржувал на законските ограничувања за оваа категорија возачи, 20 со важечка забрана за управување и 2 со несоодветна категорија.
Покрај тоа, во месецот за кој станува збор, времено биле одземени 6 возила со истечена регистрација повеќе од шест месеци, 95 возачки и 29 сообраќајни дозволи, додека тетовската „пајак-служба“ вкупно подигнала 372 непрописно паркирани возила, најмногу во централното подрачје на Тетово.
Минатиот месец вкупно биле изречени 656 мерки за неприлагодена брзина според условите на патот, односно за пребрзо возење, 22 за недавање предност, односно првенство на пешаци, 33 за непрописно престигнување и друго.